جمعية ابو الصنقيع الثقافيه الدوليه رئيس الجمعيه جعفر الخابوري

معلومات غريبةعن فنلندا Finland :

مع ان عاصمتها ( هيلسينكي ) أسقع مدينة في أوروبا بعد ريكجافيك) عاصمة( ايسلندا ) - ده سبب انهم اخترعوا الساونا - و مع ذلك هم أسعد بلد في العالم

فيها ١٨٨ الف جزيرة ( اكثر دولة فيها جزر بعد جارتها السويد و النرويج ) و ١٨٧ الف نهر في ايه يا فنلندا ؟ ده ارقام فلكية يا جماعة احنا عندنا نهر النيل في مصر ( اللي هو اطول نهر في العالم مفيش مقارنة ) و لكن احنا فرحانين اننا عندنا نهر واحد تخيل لو عندك العدد الغريب ده من الانهار

فنلندا من اغلى البلاد في العالم اقل من سويسرا بشوية هتلاقي الشاورما ب ١٠ يورو و الكافية ب ٣-٤ يورو من المكنه في السوبر ماركت و لو دخلت ستاربكس جبت شاي ( مية سخنة و فتله بس ) بتدفع ٥ يورو ال Venti

العاصمة هيلسينكي فيها ٥٠٪؜ من المهاجرين في فنلندا و في حتت مطاعم ليهم مش هتشوف غير المهاجرين

العيشة في فنلندا جميلة في الصيف لمًا بتوصل درجة الحرارة ٣٠ و في الشتا صعبة لمًا بتوصل -٣٠ .. هنا كانت بداية سانتا كلوز ( بابا نويل ) و اللي مكانه في الشمال حيث ممكن تشوف الشفق الاخضر

عندهم في الصيف ليالي بيضاء يعني الشمس بتطلع ل ٢٠ ساعة و في الشتا العكس لانهم في شمال الكرة الارضية

فنلندا دولة Nordic شمال اوروبية و هي مش دولة اسكندنافية و لكن بطريقة ما همًا بيحسوا انهم اسكندنافين و شايفين انهم سكندونافين .. هم من بحر البلطيق و لكنهم مختلفين عن دول بحر البلطيق الرئيسية ( استونيا - استونيا - لاتفيا ) و السبب طبعا انهم مدخلوش الاتحاد السوفيتي زي الدول ده ..

فنلندا مفيهاش اماكن كتير للسياحة و لكنها حلوة لو هتزور هيلسينكي يومين كسياحة في الصيف هتتبسط و لو في الشتا هتزعل … و المعيشة في الدولة ده مش اسعد دولة في العالم بالمعني اللي احنا فاهمينه لان اسعد دولة في العالم ليها معايير ( في الصحة و التعليم و العدل و غيره ) يعني مش هتلاقي الناس عمالة بتضحك في الشارع زي الافارقة مثلا اللي عندهم الحياة بسيطة و لكن بنشوفهم بيضحكوا في الصور لانهم بسيطين طبعا معيار اسعد دولة في العالم بيكون لاسباب مستوى المعيشة و التعليم و الصحة و بيكون حسابها بطريقة بحته عشان كدا ممكن الناس متكونش بتضحك في الشارع و لكنهم مستوى المعيشة عندهم عالي و. مثلا عندهم ٤ ايام دراسة و مفيش Homework في الويك اند .. البلد مليئة بالغرامات شوفت عربيات كتير واخدة مخالفتين في يوم واحد ٦٠ يورو المخالفة الواحدة .. مع ان الصحة مجانا لو طلبت الاسعاف و لما يجوا هيلاقوك عندك هبوط بس مش محتاج تروح المستشفى هيبعتلوك غرامة ٥٠٠ يورو و لو مدفعتس المواصلات او عملت Zone غلط ( مخالفة ٨٠ يورو ) او محضر و محاكمة .. طبعا في المحاكمة الغرامة بتحسب بطريقة تانية لان القاضي بيقبض بالساعة و على حسب كام دورية شرطة جنبك ساعة المشكلة و كم جلسة محكمة كله بالساعة .. و مع ذلك مشوفناش شرطة في الشارع و لكن لمًا بتحصل مشكلة الشرطة بتظهر على طول السبب الكاميرات في الشوارع و هنا مبيعملوش Patrol لان اسعار البنزين بتوصل فوق ال ٢ يورو

بالنسبالي ده حاجات كتير غريبة عن فنلندا و في الاغرب عشان مطولة عليكم بس منزلكم فيديو قريب اللي في مخيلتكم عن فنلندا هيتغير ١٨٠ درجة و في النهاية ضروري انبه ان مستوى المعيشة كويس جدا و الدولة بتحاول تساعد ال ٥،٥ مليون نسمة على قد ما تقدر

الدولة رقم ١٠١ ( فنلندا )